CHRIS HANI NUUS - Die Demokratiese Alliansie (DA) het formeel beswaar aangeteken teen ’n voorgestelde watertariefverhoging van 342% in die Chris Hani-distriksmunisipaliteit en waarsku dat die drastiese styging huishoudings, ondernemings en gemeenskapsinstellings verder onder finansiële druk sal plaas.
Dr. Vicky Knoetze, DA-leier van die amptelike opposisie in die Oos-Kaapse Wetgewer, het op 25 Mei aangekondig dat die party sy kommer skriftelik aan die LUR vir Samewerkende Regering en Tradisionele Sake, Zolile Williams, oorgedra het.
DA-raadslede van al ses plaaslike munisipaliteite in die distrik het ook beswaar gemaak teen die konsep-tariefvoorstel wat deur die Chris Hani-distriksmunisipaliteit voorgelê is.
Verhoging ‘buitensporig, onbekostigbaar’
Volgens die voorgestelde tariefskedule sal die laagste huishoudelike waterblok van R13,80 per kiloliter na R61,00 per kiloliter styg - ’n verhoging van net meer as 342%.
Die DA voer aan dat dié nuwe tarief bykans 2,8 keer hoër sal wees as Joe Gqabi se vergelykbare tarief en sowat 18,8 keer hoër as dié van Alfred Nzo.
Volgens Knoetze is die voorgestelde verhoging buitensporig, onredelik en onbekostigbaar vir huishoudings, sakeondernemings, skole, klinieke, kerke, niewinsgewende organisasies en ander instellings wat reeds onder ernstige finansiële druk verkeer.
“Chris Hani-inwoners worstel reeds met hoë werkloosheid, stygende voedsel- en vervoerkoste, wateronderbrekings, infrastruktuurprobleme, lekkasies, swak instandhouding en onbestendige dienslewering,” het sy gesê.
Deursigtigheid versoek
Die DA meen dit is onaanvaarbaar dat inwoners verwag word om só ’n groot tariefverhoging te dra sonder dat die munisipaliteit ’n duidelike berekeningsmodel, koste-van-voorsieningstudie, bekostigbaarheidsassessering of behoorlike verduideliking vir die verhoging verskaf het.
Volgens die party bepaal artikel 74 van die Wet op Munisipale Stelsels dat munisipale tariewe billik, regverdig, deursigtig en in verhouding tot die koste van dienslewering moet wees.
Die DA het die munisipaliteit versoek om volledige besonderhede oor die voorgestelde verhoging bekend te maak, insluitend die tariefberekeningsmodel, bekostigbaarheidsassesserings, besonderhede oor ondersteuning aan behoeftige huishoudings en bewys van betekenisvolle openbare deelname.
Openbare deelname
Knoetze het gesê openbare deelname kan nie bloot as ’n “afmerk-oefening” hanteer word nie en dat inwoners toegang moet hê tot voldoende inligting om ’n tariefvoorstel van dié omvang te verstaan en te bevraagteken.
Sy het benadruk dat die DA sal voortgaan om verhogings te beveg wat inwoners straf vir munisipale mislukkings en dat munisipaliteite eers infrastruktuur moet herstel, waterverliese verminder en kwesbare huishoudings beskerm voordat onbetaalbare tariewe ingestel word.
‘Ons bring jou die nuutste Tuinroete, Hessequa, Karoo nuus’
