NXUBA NUUS - Oudleerders en ondersteuners het van oraloor opgedaag vir Cradock Hoërskool se 10de Knipmesbraai wat op 8 Mei aangebied is. 

Hierdie fondsinsamelingsgeleentheid vind elke jaar plaas.

Voorsitter van die CHS Alumni, Charles Garth, vertel dat dit ’n besondere aand van kameraadskap, trots en gemeenskapsgees was.

’n Knipmesbraai is ’n spesifieke tipe Suid-Afrikaanse sosiale byeenkoms wat gekenmerk word deur die gebruik van ’n knipmes as deel van die ervaring. 

Knipmesse word ook dikwels as persoonlike geskenke uitgedeel en word gebruik om vleis direk van die spit of die kole af te sny.

Op die Vrydagaand het 320 mense saamgetrek by die CHS Oudskoliere-klubhuis langs die Groot Visrivier om deel te wees van hierdie unieke geleentheid. 

Tientalle kilogramme hout is verbrand om altesaam 14 diere op die spit te braai, terwyl vriende stories gedeel het rondom die vuur. 

Onder die afdakke en binne die klubhuis is daar net so gesellig verkeer, en die koue het niemand se geesdrif gedemp nie.

As deel van die trotse tradisie het kaartjiehouers het weereens hul gedenk-CHS-sakmesse as deel van hul kaartjiefooi ontvang.

“Die sukses van die aand bly ’n bewys van wat moontlik is wanneer die skool, die oudskole-unie en die gemeenskap hande vat,” sê Garth.

CHS se mediawoordvoerder, Maryna Kriel, het opregte dank teenoor elke borg, lid van die organiseringspan en elke man wat ’n kaartjie gekoop het om dié gesellige aand saam met CHS te geniet. 

“Sonder elkeen se ondersteuning sal al CHS se pogings tevergeefs wees,” het sy gesê.

“Van die eerste beplanning, totdat die laaste kole uitgebrand het, het die CHS Knipmesbraai weer bewys dat die krag van ’n gesonde gemeenskap geen perke ken nie. 

Ons is trots om hierdie geleentheid in vennootskap met die CHS Alumni aan te bied en sien daarna uit om dit volgende jaar weer te doen.”

‘Ons bring jou die nuutste Tuinroete, Hessequa, Karoo nuus’