OOS-KAAP NUUS - Die Oos-Kaap bly die gevaarlikste provinsie in Suid-Afrika vir moord en verkragting, ondanks geringe afnames in sommige ernstige misdaadkategorieë, volgens die jongste nasionale misdaadstatistiek wat die Demokratiese Alliansie (DA) laat alarm maak het.
Yusuf Cassim, DA-skadu-LUR vir Gemeenskapsveiligheid, sê die jongste syfers toon dat die Oos-Kaap in die vierde kwartaal, van Januarie tot Maart 2026, die hoogste moordkoers in die land aangeteken het met 14,3 moorde per 100 000 inwoners.
Die provinsie het ook die hoogste verkragtingskoers gehad, met 22,5 gevalle per 100 000 inwoners.
Volgens Cassim beteken dit dat inwoners van die Oos-Kaap steeds ’n groter kans het om vermoor of verkrag te word as inwoners van enige ander provinsie in Suid-Afrika.
Altesaam 949 moorde is in net drie maande in die provinsie aangeteken. Hoewel dit minder is as die 1 020 moorde wat in dieselfde tydperk verlede jaar aangemeld is, beteken dit steeds dat meer as tien mense daagliks in die Oos-Kaap vermoor word.
Die provinsie het ook 1 853 seksuele misdrywe, 524 pogings tot moord, 6 026 gevalle van aanranding met die doel om ernstig te beseer, en 4 046 gewone aanrandings aangeteken.
Volgens die DA wys polisiekantoorvlak-syfers hoe diep die misdaadkrisis gewortel is. Kwazakhele is die polisiekantoor met die hoogste moordsyfer in Suid-Afrika, met 59 moorde in drie maande.
New Brighton, Walmer, Kwanobuhle en Mthatha tel ook onder die land se top 20 moordbrandpunte.
Cassim sê gemeenskappe leef daagliks met geweervuur, bendegeweld, gewelddadige rooftogte en die vrees dat die polisie eers opdaag nadat nog ’n lewe verloor is.
Hy meen die misdaadkrisis kan nie slegs deur reaktiewe polisiëring opgelos word nie en pleit vir ’n permanente 24-uur gesamentlike operasiesentrum in Nelson Mandelabaai, groter kapasiteit vir misdaadintelligensie en gespesialiseerde eenhede, asook belegging in misdaadbestrydingstegnologie en sterker speurdiensvermoë.
Cassim het aangedui dat hy aan die Oos-Kaapse provinsiale polisiekommissaris, lt.genl. Vuyisile Ncata, en die LUR vir Gemeenskapsveiligheid, Xolile Nqatha, sal skryf om ’n gedetailleerde ingrypingsplan vir die provinsie se swaarste-geteisterde polisiekantore te eis.
Die DA het ook aangekondig dat die party beplan om ’n grootskaalse optog in die Oos-Kaap te mobiliseer om dringende optrede teen gewelddadige misdaad te eis.
“Misdaad moet bo-aan die agenda wees. Inwoners het polisiekantore nodig wat reageer wanneer hulle hulp vra, sake behoorlik ondersoek en verhoed dat gewelddadige misdadigers keer op keer na dieselfde gemeenskappe terugkeer,” het Cassim gesê.
‘Ons bring jou die nuutste Tuinroete, Hessequa, Karoo nuus’
