NIEU-BETHESDA NUUS - Die dorp se inwoners het Maandagoggend, 18 November, met groot opgewondenheid besef dat hul geliefde Beverley - die bekende mannekyn-kunsinstallasie - veilig terug is in haar plaasdammetjie op die Doornbergpad na 'n week lange avontuur.
Nieu-Bethesda is inderdaad verlig dat sy ongedeerd is - en dankbaar dat haar toevallige reis verskeie Klein-Karoodorpies en -ondernemings 'n oomblik in die kollig gegee het.
Aanvanklik was haar nuwe uitrusting - 'n groen blommetjiesrok en beige kopbedekking - heel vreemd, maar sy wuif nou weer pligsgetrou vir elke verbyganger.
“Dit is egter baie belangrik om te onthou dat Beverley sonder enige toestemming ontvoer is en hoewel ons verstaan dat daar geen kwaadwillige bedoelings was nie, was dit nie 'cool' nie," sê Nieu-Bethesda Toerisme.
"Sy is deel van Nieu-Bethesda se identiteit, en ons bedank almal wat besorgdheid getoon het en gehelp het om na haar te soek."
Wat inderwaarheid gebeur het, is 'n storie wat vertel behoort te word, en dié storie is selfs deur Pretoria FM en radiostasies landswyd gedeel.
“Konstruksiewerkers Quentin Potgieter en Morné van Zanten het aan Pretoria FM verduidelik dat hulle Beverley as 'n poets tydens die rugby op 8 November geskuif het - maar 'n kollega het onwetend met haar weggery.
Teen die volgende oggend, toe hulle die oproer op Facebook, en selfs Maandag in die Graaff-Reinet Advertiser se aanlynplatform sien, het hulle besef hulle moes dinge regstel.
Volgens Nieu-Bethesda Toerisme het die twee manne toe vir Beverley op 'n Klein-Karoo-uitstappie geneem.
Sy het Graaff-Reinet, Jansenville, Klipplaat en Steytlerville besoek (in die hoop om haar aan Joseph, 'n manlike mannekyn by die Royal Hotel, voor te stel).
Geklee in 'n nuwe groen-en-wit somerrokkie en 'n paar spierwit crocs het Beverley, getrou aan haar aard as meermin-mannekyn, vir talle pragfoto's regoor die Klein-Karoo geposeer voordat sy stilweg huis toe geneem is.
Die manne het ook 'n geskenkpak vir haar skepper, kunstenaar Ryno Greeff, gelos, saam met 'n T-hemp met die opskrif: "Missie Bev & Jo - Nieu-Bethesda weet nie wat ons weet nie".
Dit klink asof die twee regtig hul bes gedoen het om die gemeenskap se vergifnis te verwerf.
Beverley se avonture het wêreldbekendheid verwerf, en reaksies op sosiale media wissel van skok tot verrassing, met tientalle glimlaggende en skaterlaggende gesiggies.
Dalk het ons in die dorre karoolandskap meer Beverleys nodig om die wêreld op te vrolik!
Vandag is Beverley terug waar sy hoort - gereed om besoekers en Camino-stappers weer eens te bekoor, nou met 'n ekstra storie om te vertel.
Die Advertiser hoop Beverley het die wegbreek voor haar groot werk in Desember geniet, en is saam met die res van die wêreld opgewonde oor haar terugkeer.
‘Ons bring jou die nuutste Tuinroete, Hessequa, Karoo nuus’
