Update
GRAAFF-REINET NUUS - Drie lojale parkrun-deelnemers het Saterdag, 10 Augustus aan hul 25ste Mountain Drive parkrun in Graaff-Reinet deelgeneem.
Dít is 'n uitsonderlike prestasie, aangesien daar tot dusver slegs 28 plaaslike parkruns was. Die flukse gemeenskapslede is Mixie Goedhals, Abel Ndamase en Grant Potgieter.
"Voor die parkrun se instelling het ek altyd gestap. Ek geniet dit en dit is goed vir my gesondheid," het Goedhals met die Advertiser gedeel.
Sy het nog net drie parkruns nié bygewoon nie. "Die eerste keer was ek te bang," lag sy. "Na die eerste parkrun het ek in die Advertiser gesien ou mense en honde het ook die moeilike opdraande gestap, toe dink ek maar dan kan ek ook mos."
Die ander twee kere wat sy afwesig was het sy haar kleinkinders by sportgeleenthede ondersteun. "Ek moes Saterdag weer iewers wees, toe sê ek néé, ek gaan eers my 25ste parkrun doen."
Goedhals is bekend in Graaff-Reinet as 'n talentvolle bakster, en was juis besig om beskuit te bak toe die Advertiser een oggend bel. "Dit is my stokpertjie, en as daar oorbly deel ek dit met die parkrun-vrywilligers."
Plaaslike parkrun organiseerder Lusan Luscombe sê sy is baie trots op Goedhals, Ndamase en Potgietser se prestasie.
Agt-en-sewentig drawwers en stappers het laasweek aan die parkrun deelgeneem. Flippie Loock was eerste met 22:44. Hester Fourie was eerste van die vroue met 29:27.
Die geleentheid is moontlik gemaak deur vrywilligers Peter Burdett, Mike Calitz, Shirley Spencer, Raymond van Staden, Marna Gerber, Jacqui Taylor-Freeme, Lusan Luscombe, Charles Maasdorp, Johan du Plessis en Peter en Kim Spencer Primic.
Lees 'n vorige artikel: Ons het 25 parkruns agter die rug
'Ons bring jou die nuutste Graaff-Reinet, Karoo nuus'
