OOS-KAAP NUUS - Die vuurwapenhandelaar Karen Webb van Gqeberha, wat die afgelope 18 maande agter tralies deurgebring het in afwagting van haar verhoor, het Donderdag uit die hofsaal gestap nadat sy twee keer op een dag borgtog toegestaan is.
Algoa FM Nuus het op 14 Augustus berig dat borgtog van R10 000 aan Webb toegestaan is op 'n moordklag, en kort daarna is sy op borgtog van R1 000 vrygelaat op 'n aanklag van beweerde smokkelary van 'n selfoon in die North End-gevangenis.
Voordat sy uit die Gqeberha-landdroshof kon stap, moes sy ook 'n bykomende R10 000 vir borgtoggeld betaal ten opsigte van haar suksesvolle appèl teen die weiering van borgtog op aanklagte wat verband hou met die Wet op Vuurwapenbeheer.
Volgens Algoa FM het Webb die hofsaal glimlaggend verlaat en was vergesel deur albei haar ouers.
Sy het vervolgens in die parkeerarea voor die hofsaal agter die stuur van haar voertuig ingeskuif en saam met haar ouers weggery.
Sy wou nie mediavrae antwoord buite die hofgebou nie.
Die staat het Webb van moord aangekla en beweer dat die vuurwapens wat gebruik is om die misdade te pleeg, op 'n stadium by haar sakeperseel, Webb Arms, gestoor is.
Benewens die moordklagte, staan sy ook tereg op 'n lang lys aanklagte wat verband hou met die Wet op Vuurwapenbeheer.
Haar inhegtenisneming op 8 Februarie verlede jaar vorm deel van 'n voortgesette polisie-ondersoek na hoe vuurwapens in die besit van bendelede in die stad se noordelike gebiede en ander provinsies beland het.
Webb se vrylating op borgtog volg nadat sy 'n nuwe regspan onder Peter Daubermann van Louis van Rensburg-prokureurs aangestel het.
Haar borgtogvoorwaardes sluit in dat sy gedurende sekere ure onder huisarres geplaas word, haar paspoort inhandig, drie keer per week by die Kabega Park-polisiestasie aanmeld, en nie met staatsgetuies inmeng nie.
Sy sal weer op 22 Augustus in die hof verskyn.
‘Ons bring jou die nuutste Tuinroete, Hessequa, Karoo nuus’
