HOFMEYR NUUS - Axolisiwe Mbontsi - bekend as Axel - het grootgeword in Hofmeyr in die Oos-Kaap, en het nooit gedink dat hy eendag pasgemaakte diamantjuweliersware vir kliënte regoor Johannesburg sou vervaardig nie.
As die seun van ’n ywerige sakeman in Hofmeyr, het hy vroeg reeds geleer dat harde werk nodig is om sukses te behaal.
Mbontsi het sy skoolloopbaan in Hofmeyr afgeskop, maar het by die Hexagon Hoërskool in Komani matrikuleer.
'n Nuwe droom
Vandag is sy maatskappy, Axel & Co, 'n bewys dat passie, presisie en volharding ’n nederige begin in sprankelende sukses kan omskep.
“Ek is basies ’n plaasseun,” sê Mbontsi. Sy drome het nooit juweliersontwerp ingesluit nie.
Hy het aanvanklik beplan om argitektuur die Kaapse Skiereiland Universiteit van Tegnologie (CPUT) te studeer.
“Hulle het ’n program gehad waar hulle al die ontwerpkursusse in dieselfde fakulteit aangebied het,” onthou hy.
“Ek het die juweliersware-ontwerp- en vervaardigingskursus gesien en gedink, dit is anders. Ons gebruik dieselfde ontwerpsagteware as argitekte – ons ontwerp net op ’n kleiner skaal.”
Hy het sy drie-jaar nasionale diploma in juweliersware en vervaardiging in 2011 voltooi en toe ’n jaar lank gemmologie-opleiding gedoen, waar hy geleer het om diamante en edelstene te gradeer.
Hierdie omvattende opleiding was van onskatbare waarde toe hy die bedryf in 2013 as verkoopsbestuurder betree het en uiteindelik tot besturende direkteur gevorder het voordat hy sy eie onderneming in 2018 van stapel gestuur het.
“Ek het basies iemand anders se besigheid bestuur, wat my die vaardighede geleer het wat ek nodig gehad het om my eie vervaardigingsaanleg te bestuur,” verduidelik hy.
Verstommende groei
Axel & Co het amptelik in 2019 begin handel dryf, maar dit was die bekendstelling van hul vervaardigingsfasiliteit in Augustus 2023 wat die groei werklik versnel het. Vandag het die maatskappy vier mense in diens.
“Die groei is nogal skrikwekkend,” erken Mbontsi.
“’n Jaar gelede het ek net aan myself en my gesin gedink. Nou word ek wakker en dink aan mense wat van hierdie besigheid afhanklik is vir hul lewensonderhoud. Dis ’n groot verantwoordelikheid.
”Die maatskappy spesialiseer in pasgemaakte stukke vir privaat kliënte asook die lewering van vervaardigingsdienste vir ander juweliersondernemings.
Onlangse hoogtepunte sluit in ’n pragtige diamantinleg-ring en ’n onvergeetlike 22-karaat goue leeu-armband wat 120 gram weeg – ’n drie maande lange projek wat vir beide die skepper en die kliënt diep betekenisvol geword het.
Uitdagings
Sukses het egter nie sonder uitdagings gekom nie.
Toerustingonderhoud bied probleme, aangesien baie masjiene van oorsee ingevoer word.
“As iets breek, moet ons dit soms terug oorsee stuur omdat Suid-Afrika nie tegnici vir hierdie gespesialiseerde masjiene het nie,” sê hy.
Hierdie tegniese realiteit het sy uitbreidingstrategie gevorm. Eerder as om rugsteuntoerusting stil te laat staan – wat aansienlike kapitaalbelegging sou vereis – werk Axel & Co soms saam met ander vervaardigers tydens toerustingonderbrekings.
Realistiese visie
Mbontsi beoog om die besigheid te verdubbel of verdriedubbel sonder om sy verbintenis tot gehalte in te boet.
Sy aanvaarding in die De Beers Enterprise Development Program het hierdie visie bekragtig.
Die driejaarprogram is daarop gemik om klein en mediumgrootte besighede in die diamantverwerkingsektor te bemagtig deur mentorskap, vaardigheidsopleiding en sakevernuf te bied en terselfdertyd ekonomiese groei en werkskepping te bevorder.
“Hulle het die groei en potensiaal in my besigheid gesien, en ek sal vir ewig dankbaar wees,” sê Mbontsi.
Danksy die program, het sy sakeperspektief reeds, in net 'n paar maande, geskuif.
Mbontsi se ouers, wat ’n uitgebreide publieke vervoerbesigheid in Hofmeyr bedryf, is onbeskryflik trots op hul seun.
‘Ons bring jou die nuutste Tuinroete, Hessequa, Karoo nuus’
