CRADOCK-NUUS - Graaff-Reinet Advertiser maak gereed om hierdie jaar vanaf 19 tot 21 Junie die Schreiner Karoo-skrywersfees in Cradock by te woon.
Dit beloof om ’n ervaring en voorreg te wees om ruimte met die groot name te deel terwyl bekende skrywers en dramaturge vanuit die Cradock-geledere ook teenwoordig sal wees.
Melina Smit, Mthombo Mali, Liza Badenhorst, Elsje Taljaard, Madeleine Bazil en Casey Diepenveen van Holding Thumbs-produksies, Corné Slabbert en Izak de Vries, Kevin Davie, Tammy Southby, Ronel Wright, Melvin Iverson en Myrlene Alberts, Tammy Southby, die Amazwi-uitreik, Rhuhan Fourie, Jimmie Simons, Freda Froehlick, Morne Taks, Junayda Abrahams, Luyolo Stengile, Denise Jack, Elsabe en Gideon Groenewald, Pieter van der Westhuizen, Chris en Julie Marais en Tony Jackman is van die bekende name wat hierdie jaar in die program ingewerk is.
Litnet het ook in ’n mediavrystelling die Schreiner Karoo-skrywersfees uitgelig.
“Die fees is ’n jaarlikse literêre viering in Cradock met skrywers hoofsaaklik uit die Karoo.
Aandbyeenkomste sluit dikwels aandete en teateropvoerings, geselsies by die kaggel en oopmikrofoonsessies in, aangevul deur hartlike Karoo-kos en warm gasvryheid.
Dit moet nie verwar word met die Etienne van Heerden-veldsoirée nie.
Die Schreiner Karoo-skrywersfees vereer die nalatenskap van Olive Schreiner, wat in Cradock gewoon het, en die bekende skrywer van The Story of an African Farm is. Sy was Suid-Afrika se eerste noemenswaardige romanskrywer en ’n baanbrekende feminis en sosiale hervormer.
Teen die suggestiewe agtergrond van die pragtige Karoo bied die fees ’n aangename en meeslepende ervaring van teateropvoerings, storievertelling by die kaggel, skryfwerk, kultuur en gemeenskap.
Opvoedkundige uitreik is ’n sleutelkomponent van die fees, met inisiatiewe soos die Avbob-poësieprojek en Amazwi-uitreik.
Hierdie programme is daarop gemik om jong stemme te koester en die liefde vir lees en skryf te bevorder.
Elke jaar bring die fees ’n lewendige mengsel van skrywers bymekaar.”
“Ons verwelkom jou graag in die pragtige en inspirerende Karoo!” nooi Lisa Ker, gasvrou van hierdie jaar se Schreiner Karoo-skrywersfees.
‘Ons bring jou die nuutste Tuinroete, Hessequa, Karoo nuus’
