Update

UITENHAGE NUUS - Twee verdagtes, wat verbind word met die ontvoering van Theresa Minnie (73), wat aanklagte van ontvoering, mensehandel en afpersing in die gesig staar, het onlangs hul borgtogaansoeke laat vaar en bly in aanhouding.

Shanti Japhta, van die Komani-Karoo Express, wat die verhoor bygewoon het deel mee dat die twee verdagtes, Andile Mathumbu en Ayabulela Busakwe, wat verbind word met die ontvoering van Theresa Minnie (73) op 11 Augustus, op 27 Augustus in die Uitenhage-landdroshof verskyn het vir hul formele borgtogaansoek.

Die twee het egter besluit om hul borgtogaansoeke te laat vaar. 

Die twee verdagtes wat daarvan beskuldig word dat hulle Theresa Minnie ontvoer het, het hul gesigte weggesteek toe die media toestemming gekry het om hulle te fotografeer, deel Shanti Japhta mee.

Die aanklagte teen hulle, soos in die hof voorgelees deur landdros Jason Thysse, is ontvoering, menshandel en afpersing, wat Bylae 6-misdrywe is soos gedefinieer deur die Suid-Afrikaanse Strafproseswet.

“Die verrigtinge het verander van wat veronderstel was om 'n standaard borgtogaansoek te wees, in 'n debat tussen die staat en die verdagte. 

Die verdagtes se prokureurs, onderskeidelik Luyolo Shaun Sopazi en Kwaku Aduna, het aangevoer dat die publikasie van hul kliënte se foto's hul reg op veiligheid verder sou skend. 

Mathumbu het aan die hof beweer dat hulle fisies aangerand is deur polisiebeamptes met hul inhegtenisneming, en bygevoeg dat hy dreigemente van die arresterende beamptes ontvang het,” lui die inligting wat deur Japhta gedeel word.

Sopazi het aan die hof gesê: "Om my kliënt te laat fotografeer en publiseer, sal sy familie in gevaar stel om geteiken te word en my kliënt sal 'n plakkaatseun vir hierdie tipe misdaad gemaak word." 

Hierdie stelling is ondersteun deur Aduna, wat bygevoeg het dat die verdagtes nog nie deur die slagoffer geïdentifiseer is nie.

Die staat het nie die versoek om die verdagtes te fotografeer en video-op te neem, teengestaan nie. 

Thysse het alle argumente wat aan hom voorgelê is rakende die saak aangehoor en die media toestemming verleen om verrigtinge en toekomstige verskynings op te neem, mits dit nie met hofverrigtinge inmeng nie.

Beide verdagtes het hul borgtogaansoeke laat vaar. 

Volgens Japhta het die VF Plus-koukusleier van Nelson Mandelabaai, Bill Harington, gesê: “Die VF Plus het dit duidelik gemaak dat die party die staat se standpunt ten volle ondersteun, naamlik dat borgtog teengestaan moet word. 

Volgens die party is dit noodsaaklik dat 'n duidelike boodskap aan kriminele elemente, en veral die ontvoeringsindikaat in Gqeberha, gestuur word dat hierdie misdade nie geduld sal word nie.”

Hy het bygevoeg: “Die wet moet sy volle gang gaan, en prioriteit moet gegee word aan hierdie tipe ernstige misdaad, veral omdat dit gemeenskappe destabiliseer en 'n klimaat van vrees skep.”

Japhta deel ook mee dat Thysse meegedeel het dat die ondersoek nog nie afgehandel is nie, aangesien daar verskeie dinge is wat eers voltooi moet word, soos selfoonrekords en -analise, chemiese analise, finansiële rekords, doprekords en videobeelde.

‘Ons bring jou die nuutste Tuinroete, Hessequa, Karoo nuus’