GRAAFF-REINET NUUS - Gemeenskapsgees, deernis en deursettingsvermoë was aan die orde van die dag toe ondersteuners op Saterdag en Sondag, 9 en 10 Mei, saamgetrek het vir Camdeboo Hospice se jaarlikse Hike & Hobble.
Dié fondsinsamelingsgeleentheid het stappers, fietsryers, drawwers, families en plaaslike ondernemings byeengebring ter ondersteuning van die noodsaaklike palliatiewe sorgdienste.
Vier en tagtig deelnemers het die pragtige Camdeboo-roetes aangepak om fondse vir Hospice in te samel.
Die eendaguitdaging het oor die 50 km vanaf die Dassiespoort-afdraai tot by Nieu-Bethesda gestrek.
Sommige deelnemers het slegs die eerste 25 km voltooi, terwyl ander by Weltevreden oornag het en Sondag die oorblywende 25 km as deel van die tweedag-uitdaging voltooi het.
Borgvorms wat vriende, familie en besighede aanmoedig om by te dra tot die saak, het vooraf gehelp om die gemeenskap te betrek.
Susan van der Linde, bestuurder van Camdeboo Hospice, het bevestig dat vanjaar se fondsinsameling meer as verlede jaar se totaal beloop het, en het gesê dat alle fondse aangewend sal word vir die sorg en ondersteuning wat Hospice bied.
“Die ondersteuning wat ons deur geleenthede soos die Hike & Hobble ontvang, maak ’n enorme verskil,” het sy gesê.
“Elke inskrywing, borgskap en skenking help ons om voort te gaan met deernisvolle sorg.”
Van der Linde het spesiale melding gemaak van Sharon Shell, wat vir baie jare die eendag-staproete vir Hospice georganiseer het voordat sy weens gesondheidsuitdagings moes terugstaan.
Hoewel sy reeds verlede jaar weer aan die geleentheid deelgeneem het, was vanjaar vir Sharon besonder spesiaal omdat sy die 25 km-roete saam met haar jongste dogter, die matriekleerling Ashleigh Shell, voltooi het.
Van der Linde het almal wat bygedra het tot die dag, bedank: Pick n Pay (borg van T-hemde), Wayne Palmer van Wolff & Johnstone (versnaperinge in geskenksakkies), Archie Cronjé van die Spandaukop ATKV-tak (braai by die eindpunt by Bruno’s Pizzeria in Nieu-Bethesda), Camdeboo Meats (wors), vrywilligers (bemanning van ondersteuningsvoertuie en waterpunte), Engen Riverside, Build It, Drostdy Toyota, Pam Golding, Nommerpas, Queen Midas Graaff-Reinet, Oasis en Body Fuel (skenk van gefiltreerde water), Mechcraft Dynamics (borg van medaljes), en Sheards by Weltevreden (oornagplek vir deelnemers aan die tweedag-uitdaging).
“Die Camdeboo Hospice-bestuurslede het ’n groot rol gespeel; een bestuurslid het die eendag-50 km voltooi, ’n ander het ’n ondersteuningsvoertuig beman, terwyl nog een ’n waterpunt bestuur het; bestuurslede het ook die oornagverblyf georganiseer, gesorg vir etes vir deelnemers, en het die Sondag-staproete en ondersteuningsvoertuie gekoördineer,” het Van der Linde gesê.
“Aan al ons deelnemers: Sonder julle sou daar geen Hike & Hobble wees nie.”
‘Ons bring jou die nuutste Tuinroete, Hessequa, Karoo nuus’
