JANSENVILLE NUUS - Die Oos-Kaapse Departement van Maatskaplike Ontwikkeling het onlangs tydens 'n toer deur die Oos-Kaap besoek gebring aan die Flinkvingers Vrouegroep in Jansenville.
As 'n borg vir die groep se opheffingswerk in die dorp het die departement belang by hul aktiwiteite.
Flinkvingers
Flinkvingers Vrouegroep het in 2020 die Covid-pandemie ontstaan toe 'n groep afgetrede professionele persone hul vaardighede saamgesnoer het om die nood in die gemeenskap aan te spreek en positiewe verandering teweeg te bring.
Onder leiding van Suster Notisi Vanda, 'n afgetrede onderwyseres en politikus en bekende ABCD-aktivis in die Oos-Kaap, het hulle 'n sopkombuis begin om veral plaasmense te voed wat na die Kwazamakucinga-kliniek en plaaslike hospitaal kom vir chroniese sorg.
Op hierdie stadium ontvang 100 mense per dag kos.
Die toerusting vir die sopkombuis is deur die Cacadu-ontwikkelingsagentskap geskenk, terwyl Ikhala Trust-befondsing ingestaan het om die lopende kostes te dek.
Die Departement van Maatskaplike Ontwikkeling het fondse vir die groentetuin verskaf sodat vars groente aan die sopkombuis verskaf kan word.
Fondsinsamelings
Die vroue van Flinkvingers staan nie terug vir uitdagings nie.
Hulle bied jaarliks 'n debutantebal aan en sorg dat die tieners vooraf in “ball room dancing” opgelei word.
Die groep het ook onlangs 'n spa-dag gehou waar drie jong vroue wat deur 'n plaaslike terapeut opgelei is om masserings te doen, ook ingespring het.
Tans beplan Flinkvingers 'n potjiekoskompetisie om fondse in te samel vir hul uitreikprogramme by die plaaslike skole, waar hulle poog om die hoë aantal tienerswangerskappe onder skoolmeisies aan te spreek.
“Hier is regte vroue besig om ander vroue te bemagtig,” het Chris Engelbrecht, programbestuurder van die Oos-Kaapse Departement van Maatskaplike Ontwikkeling, na hul besoek gesê.
‘Ons bring jou die nuutste Tuinroete, Hessequa, Karoo nuus’
