KAROO NUUS - Die jaarlikse SA Nasionale Parke Week-veldtog sal van 16 tot 24 September hier by Graaff-Reinet se eie Camdeboo Nasionale Park, plaasvind.
Vir die eerste keer sedert die ontstaan van hierdie veldtog, is die gratis toegangsweek tot nege dae verleng om twee naweke in te sluit.
Sedert 2006 het Nasionale Parke Week, onder die tema, Ken Jou Nasionale Parke, 'n instroming van meer as 691 418 dagbesoekers in alle deelnemende parke gesien.
SANParke se hoof- uitvoerende beampte, Hapiloe Sello, sê die idee van 'n nasionale parke fokusweek is deel van 'n wêreldwye veldtog.
"Die nege dae is ingestel in 'n poging om 'n gevoel van trots in Suid-Afrika se natuurlike, kulturele en historiese erfenis te kweek. Dit is ook in lyn met die SANParke-visiestelling van 'n volhoubare Nasionale Park-stelsel wat die samelewing verbind."
SANParke-week het bewys dat dit suksesvol is in terme van opvoeding en bewusmaking van bewaringskwessies.
"Dit is belangrik vir Suid-Afrikaners om nasionale parke te besoek en die belang daarvan te ken. Hulle dien as ruimtes vir volhoubare bewaring, wat ons kultuur en erfenis bewaar en vier. Ons sien nou nasionale parke as 'n kritieke rolspeler in die bemagtiging van gemeenskappe wat langs parke woon deur die skep van werksgeleenthede, en ons bly voortdurend maniere ondersoek om besigheidsgeleenthede te skep, veral vir eienaars van kleinbesighede," sê Sello.
"Hierdie inisiatief het ten doel om die publiek 'n begrip te gee van die rol wat SANParke speel as bewaarder van die land se natuurlike erfenis. As ons 'n gevoel van eienaarskap van Suid-Afrika se natuurlike erfenis in alle Suid-Afrikaners wil skep, moet alle Suid-Afrikaners toegang daartoe kan hê. Besoek 'n nasionale park vanjaar gratis tydens SANParke-week om te sien wat dit bied en doen jou deel deur jou nasionale parke te leer ken, jou ryk erfenisaanbod te vier en die ikoniese skoonheid en oorvloed van natuurlike flora en fauna eerste hands te ervaar," het Sello afgesluit.
Gratis toegang
Gratis dagtoegang tot Camdeboo stel besoekers in staat om die park in sy geheel te verken. Hulle kan kies om deel te neem aan een van die vele staproetes, die 4x4-roetes aan te pak, of tyd by een van die piekniekplekke deur te bring.
Dagbesoekers kan ook die wêreldberoemde vallei van verlatenheid besoek of self deur die park ry om na voël- en wildlewe te kyk. Die veldtog bied gratis toegang vir die meeste van die 21 nasionale parke vir dagbesoekers, veral mense uit die plaaslike gemeenskappe aan. Vir individuele park datums en deelnemende parke, besoek www.sanparks.org
Ander parke in die streek wat ook aan die veldtog deelneem, sluit in die Karoo Nasionale Park (buite Beaufort-Wes) en Bergkwagga Nasionale Park (naby Cradock), wat ook dagbesoekers vanaf
16 tot 24 September sonder koste verwelkom. Addo Olifant Nasionale Park, buite Port Elizabeth, sal slegs van Maandag tot Vrydag gratis toegang hê. Alle Suid-Afrikaanse besoekers wat van die veldtog gebruik gaan maak word versoek om hul identiteitsdokumente saam te neem.
‘Ons bring jou die nuutste Tuinroete, Hessequa, Karoo nuus’
