KAROO NUUS - Die misbruik van alkohol het die meeste arrestasies in Graaff-Reinet en Aberdeen tot gevolg gehad vir die tydperk Woensdag, 30 Oktober, tot Dinsdag, 5 November.
Die Graaff-Reinet Polisie het sewe mense toegesluit vir dronkenskap. Dit was Aberdeen se polisie wat min genade getoon het en 10 mense vir dié misdryf toegesluit het.
Graaff-Reinet
Drie vermeende moordenaars en een roofverdagte is in hegtenis geneem. Ander geweldsmisdrywe, soos aanranding met die doel om ernstig te beseer (vyf arrestasies), aanranding gewoon (twee arrestasies) en opsetlike saakbeskadiging (een arrestasie) is ook goed aangespreek. Vir gesinsgeweld is een persoon aangekeer.
Mense met lang vingers het ook in die lang arm van die gereg vasgeloop. Twee vermeende huisbrekers en ses diefstal verdagtes is voor die hof gedaag. So is een verdagte vir winkeldiefstal en een vir veediefstal in die vangwa gelaai.
Die besit van dwelms het twee mense agter tralies laat beland.
Aberdeen
Ook hier is vyf vermeende geweldenaars vir aanranding met die doel om ernstig te beseer toegesluit.
Ander misdrywe waarvoor verdagtes selle toe geneem is, sluit in diefstal vanaf motor (1), huisbraak (1), gesinsgeweld (1) en veediefstal (1).
Vonisse
Winkeldiefstal: ses maande gevangenisstraf.
Besit van mandrax: 30 dae gevangenisstraf, opgeskort vir drie jaar.
Huisbraak: 18 maande gevangenisstraf, opgeskort vir een jaar.
Diefstal: 15 maande gevangenisstraf.
Besit van gesteelde eiendom: drie maande gevangenisstraf.
