GRAAFF-REINET NUUS - Die Middelburg-weegbrugprojek is nou vir reeds meer as 'n jaar vertraag, terwyl werkers onbetaald bly, en niemand aanvaar aanspreeklikheid nie.
So sê LP Heinrich Muller, die DA se Oos-Kaapse Midlandse Kiesafdelingsleier, wat in Middelburg woon.
Muller sê weegbrugprojek het in chaos verval, gekenmerk deur gemisde spertye, onbetaalde werkers en 'n blatante verontagsaming van aanspreeklikheid.
LUR en burgemeester 'doen niks'
Ten spyte van herhaalde waarskuwings van talle burgerlike organisasies, het LUR Xolile Nqatha en burgemeester Noncedo Zonke niks aan die saak gedoen nie. Nou is hierdie kritieke projek in limbo terwyl kostes styg.
"Hierdie vasgevalde projek is nie net 'n burokratiese misstap nie, dit raak die mense van Middelburg direk wat verslegtende padtoestande en toenemende veiligheidsrisiko's in die gesig staar. Onmiddellike ingryping is nodig," sê Muller.
Kommer oor prosesse
Muller is ernstig bekommerd oor die departement van vervoer se verkrygings-prosesse.
"Die voortdurende gebrek aan deursigtigheid en gebrek aan optrede het openbare frustrasie aangevuur, wat dui op 'n ernstige skending van aanspreeklikheid en omsigtigheid.
"Die projek het versleg tot die punt waar werkers onbetaald bly, noodsaaklike padbasismateriaal vir die Meintjiesstraat-ingang nie afgelewer is nie en plaaslike KMMO's stelselmatig opsy gesit word."
Vorige verskaffers voer ook aan dat hulle nie vir hul voltooide werk betaal is nie.
Onmiddellike stappe nodig
'n Onmiddellike ondersoek na hoe die kontrakteur, Khoza Tradings, die kontrak bekom het word geëis, asook 'n ondersoek na alle betalings wat tot op datum gemaak is. Werkers moet betaal word en 'n duidelike projektydlyn moet ingestel word.
"Sou LUR Nqatha en burgemeester Zonke voortgaan om hierdie krisis te ignoreer, sal alle beskikbare oorsigkanale gevolg word, insluitend wetstoepassingsliggame, om openbare belang te handhaaf en aanspreeklikheid af te dwing," sê Muller.
Vore is gegrawe en daarna het werk tot 'n stilstand gekom.
‘Ons bring jou die nuutste Tuinroete, Hessequa, Karoo nuus’
