KAROO NUUS - Die Oos-Kaap is die naweek deur twee ernstige padongelukke getref waarin een persoon dood is, drie ander vermoedelik verdrink het en ses mense beseer is. Die voorvalle het in die vroeë oggendure van Saterdag in Addo en op die R56 tussen Ugie en Elliot plaasgevind.

Volgens mnr. Unathi Binqose, woordvoerder van die Oos-Kaapse Departement van Vervoer, het die departement met groot kommer kennis geneem van die twee ernstige ongelukke.

In die eerste voorval het ’n ligte motorvoertuig met vyf insittendes omstreeks 02:30 van ’n plaaspad in Addo af gery en teen ’n wal gebots voordat dit in ’n watermassa beland het.

Twee van die insittendes, albei buitelandse burgers, het daarin geslaag om uit die voertuig te ontsnap voordat dit onder die water verdwyn het. Die drie ander insittendes was na bewering in die voertuig vasgekeer en word vermoedelik dood nadat hulle saam met die voertuig onder die water verdwyn het.

Polisieduikers is ontplooi en bergingswerk was teen die tyd van publikasie steeds aan die gang om die voertuig te herwin en na die vermiste persone te soek.

In ’n afsonderlike ongeluk op die R56 tussen Ugie en Elliot het een persoon omstreeks 01:30 gesterf en ses ander beserings opgedoen toe ’n bakkie en ’n sedanvoertuig kop-aan-kop gebots het.

Die oorledene, ’n volwasse man, is op die toneel dood verklaar. Die ses beseerdes is na mediese fasiliteite in Komani vervoer vir behandeling.

Die Polisie het ’n saak van strafbare manslag geopen en ondersoek die omstandighede wat tot die botsing gelei het.

Die Departement van Vervoer het sy meegevoel met die families van die slagoffers uitgespreek en motoriste gemaan om ekstra versigtig te wees wanneer hulle snags reis of in ongunstige weersomstandighede bestuur.

“Terwyl herstel- en ondersoekwerk voortduur, doen ons weer ’n beroep op alle padgebruikers om veiligheid eerste te stel en verantwoordelik op die paaie op te tree,” het Binqose gesê.

‘Ons bring jou die nuutste Tuinroete, Hessequa, Karoo nuus’