ABERDEEN NUUS - Die Karoo het soos een familie saamgegil van blydskap toe Hanna en Dirk van der Westhuizen van Aberdeen met die bo-goud en onder-pienk hane weggestap het in die onlangse Kokkedoorkompetisie.
Die ma-en-seun-span van die Kamdebo Padstal net skraps by Aberdeen is op 8 Januarie in die finale episode van die 2025 Kokkedoor: Son, See Kookuitdaging as wenners aangewys.
Beoordelaars Herman Lensing (redakteur van Sarie Kos en skrywer van talle kookboeke) en Yolani Abrahams (glanssjef, restaurateur en ma) het Hanna en Dirk as huis- en moderne kok gekomplimenteer.
In die finale uitdaging het die twee te staan gekom teen Andrew Anderson, ’n pastoor van Mtunzini, en sy dogter, Leoné Smit, ’n boervrou.
Die uitdaging was om ’n feesmaal vir 25 voor te berei, bestaande uit ’n vingerhappie, drie hoofgeregte van outydse partytjiekos met ’n splinternuwe kinkel, en ’n verrassingsnagereg; die enigste vereiste was dat dit die verlede met die hede moes versoen.
Die beoordelaars het agter die skerms ook elke gereg beoordeel, en die ware wenners was ’n algehele verrassing.
Die Van der Westhuizens was oorstelp toe van hul grootste ondersteuners opdaag: Hanna is bederf met ’n besoek van haar tannie, Taya Esterhuizen, wat hulle aangemoedig het om in te skryf, en Dirk met sy lewensmaat, JC van der Merwe, die bemarker van Kamdebo, se teenwoordigheid.
Toe die ma en seun van Aberdeen met die louere wegstap, het trane vryelik gevloei, Aberdeen het saam met die wenners feesgevier.
Tydens Hanna se onderhoud met Lensing het sy vertel dat sy bitter graag ’n borduurmasjien met haar prysgeld sou wou aankoop, “net eers vir my eie genot”.
Dirk, op sy beurt, het gesê dat kreatiwiteit sy dryfveer is, en dat hy graag onder druk funksioneer.
“Kokkedoor het my weer herinner hoekom ek kosmaak so geniet: dis storievertel met jou hande.”
Vir albei was die tyd wat hulle tydens die reeks met mekaar gedeel het, die belangrikste.
Dirk was besonder beïndruk met die besoek deur die groot Suid-Afrikaanse kosgees Reuben Riffel en het beklemtoon dat Riffel deurgaans vir hom ’n inspirasie was.
“Dit was wonderlik om sy terugvoer oor ons eie resep te kon kry.”
Die wenners van Kokkedoor: Son & See het R500 000 ontvang, geborg deur World Sports Betting, asook ’n Mervyn Gers-eetstel elk, wat vir Hanna ’n hoogtepunt was.
Die tweede span se prys was R180 000, geborg deur Spekko.
‘Ons bring jou die nuutste Tuinroete, Hessequa, Karoo nuus’
