OOS-KAAP NUUS - 'n Senior amptenaar wat uit die KwaZulu-Natalse Departement van Samewerkende Regering en Tradisionele Sake geskors is oor bewerings van bedrog en wanadministrasie, is herontplooi na die Oos-Kaapse rampbestuurseenheid.
Retief Odendaal, skadu-LUR vir Samewerkende Regering en Tradisionele Sake, het onlangs gesê hierdie verwikkeling vereis dringende verduideliking van die Oos-Kaapse regering.
Hy het gesê dat honderde miljoene rande in rampverligtingsbefondsing beskikbaar gestel is om die nasleep van die verwoestende vloede in Mthatha en omliggende gebiede aan te spreek.
“Ongelukkig het die Departement van Samewerkende Regering en Tradisionele Sake dit goedgedink om Chuleza Hombisa Jama aan te stel, 'n KZN-amptenaar wat tans bewerings van bedrog en wanadministrasie in die gesig staar.
Hy het sterk standpunt ingeneem oor hierdie stap.
"Dit tart logika, ondermyn aanspreeklikheid en plaas noodhulpbronne in direkte gevaar," het hy gesê.
"Waarom stel die Oos-Kaapse regering willens en wetens 'n amptenaar aan wat dissiplinêre stappe in 'n ander provinsie in die gesig staar?”
Odendaal het 'n beroep gedoen om duidelikheid rondom die goedeuring van dié aanstelling en die keuring wat plaasgevind het, indien enige.
'Horisontale oordrag'
Mediaberigte dui daarop dat Jama in April uit haar pos in KZN geskors is na 'n forensiese ondersoek na die mislukte Jozini-waterprojek van R151 miljoen.
Ten spyte hiervan beklee sy nou hierdie senior rol binne die Oos-Kaap se rampbestuurseenheid.
Volgens die departement was dit 'n horisontale oordrag wat nie die standaard werwingsproses vereis het nie.
Hierdie skuiwergat laat 'n persoon onder aktiewe ondersoek toe om tussen provinsies te skuif sonder dat die aard van die dissiplinêre stappe teen hulle bekendgemaak word.
Odendaal het gesê sulke maneuvers ondermyn die openbare vertroue in die regering en verswak institusionele integriteit.
"Rampbestuur steun op vertroue, doeltreffendheid en aanspreeklikheid.
Om iemand met 'n onopgeloste wangedraggeskiedenis in beheer van noodreaksie en befondsingsbesluite te plaas, is 'n risiko wat die provinsie nie kan bekostig nie," het hy gesê.
"Die stelsels wat rampverligting bestuur, moet beskerm word teen inmenging of wanbestuur.
Elke huishouding in Oos-Kaap verdien om te weet dat, wanneer 'n krisis toeslaan, die mense wat die reaksie lei, bekwaam, eties en behoorlik gekeur is.
Openbare geld wat vir rampverligting bedoel is, moet nie deur politieke maneuvers of interne begunstiging in die gedrang kom nie."
‘Ons bring jou die nuutste Tuinroete, Hessequa, Karoo nuus’
