ABERDEEN NUUS - ’n Inwoner van Aberdeen, Wilhelm van der Vyver (58), is van plan om die uitmergelende bergfietsmarathon, die Munga, te ry as fondsinsameling vir die enigste residensiële fasiliteit vir bejaardes in Aberdeen, Aalwynhof Tehuis vir Bejaardes.
Agter sy besluit lê ’n emosionele band met die tehuis.
“Hierdie is vir my ’n persoonlike uitdaging, omdat my oorlede moeder, Verna, vir 30 jaar by die ACVV betrokke was.
Sy het haar lewe en liefde, toewyding en sorg aan Aalwynhof gewy. Aalwynhof het haar op hul beurt weer versorg in haar laaste weke met kanker, en nou, terwyl Aalwynhof in ’n finansiële krisis verkeer as gevolg van stygende kostes en beperkte plaaslike toegang tot bystand en hulp, ervaar die instansie probleme om hul mees basiese verpligtinge na te kom,” sê hy.
“Ek besef dat sonder hulp van buite, Aalwynhof voor ’n groot krisis staan, terwyl dit steeds voortdurende hoë kwaliteit sorg moet lewer aan elke inwoner.”
Hy beklemtoon dat die personeel daagliks meer as hul skoene vol staan om hul werk onder die moeilike omstandighede te verrig.
Die Munga
Die Munga is ’n 1 100 km-bergfietsmarathon wat vanaf 26 November tot 1 Desember ononderbroke van Bloemfontein na Wellington deur die onherbergsame omgewing van die Karoo gery word.
Met ’n reputasie as een van die moeilikste bergfiets-uitdagings op aarde, kan slegs die fiksste van die fikses hierdie marathon voltooi.
Van der Vyver het al aan vele uitdagings deelgeneem, maar hierdie keer gaan hy sy pyn vergelyk met die krisis waardeur Aalwynhof gaan.
Volgens sy oefenspan redeneer hy dat hy kon kies om hieraan deel te neem, terwyl die inwoners van Aalwynhof geen keuse het in die lewensveranderende omstandighede waardeur hul tans gaan nie.
Visie
Aalwynhof se visie is om ’n strategiese belegging in permanente bejaardesorg te verskaf, sluit die opknapping en modernisering van die instansie in, asook die aanbring van sonkragstelsels.
Indien hierdie droom bewaarheid kan word, sal die tehuis se maandelikse uitgawes drasties verminder.
Voornemende borge word genooi om die tehuis te kontak.
Vind meer inligting oor Van der Vyver se uitdaging en sy vordering, besoek die webwerf, www.cyclingforaalwynhof.co.za.
Aalwynhof doen 'n ernstige beroep op elke individu om Van der Vyver se fondsinsameling te ondersteun.
Vir meer inligting en om 'n donasie te maak, kontak Aalwynhof se bestuurder, Debbie van Heerden, by 082 746 0461, of vind die skakel op die webwerf hierbo.
‘Ons bring jou die nuutste Tuinroete, Hessequa, Karoo nuus’
