CRADOCK NUUS - Die bekende aktrise en skrywer, Susan Coetzer, het Cradock se vroue die afgelope Saterdag, 25 Maart, laat lag en laat dink.
Die besoek is as 'n fondsinsameling deur die reëlingskomitees van Fanie Theron Preprimêr en Cradock Voorbereidingskool gereël en het 150 dames na die Cradock-gholfklub gelok.
Coetzer se CV spreek van 'n vrou wat hard werk en letterlik alles insit. Sedert sy haar studies voltooi het, het sy reeds in agtien suksesvolle toneelstukke en verhoogstukke opgetree.
Sy bly skryf en was vir drie jaar 'n joernalis by Rooi Rose en doen steeds vryskutwerk vir Lig, Rooi Rose, Finesse en Maksiman.
Susan is ook 'n kunstenaar en het haar eie kunsgalery.
Sy was drie maal getroud, en uit haar laaste huwelik met Frank Opperman het sy 'n seun.
"Die dag was 'n ontsnapping uit my daaglikse sleur," sê Durby-Ann Swart, wat werk by Cradock-begrafnisdienste. "Met my kniebroek en vrolike bloes, het ek die see van vrouegesigte Saterdagoggend tegemoet gestap, en was so dankbaar om 'n bekende gesig te sien."
Vetkoek of souttert
"Susan het vroue uitgelig as verskillende koeke en terte, en karaktereienskappe gekoppel aan elkeen, waarmee vroue kon identifiseer. So byvoorbeeld het sy na vetkoeke verwys as daai hardwerkende tannies by allerhande byeenkomste, terwyl die suurlemoenterte vrouens is wat altyd hulle eie belange eerste stel. Sy het ons geleer om mekaar aan te vul eerder as om te kritiseer en negatief te wees. Sodoende kan ons elkeen balans bring. Dis dan ook duidelik dat almal vir God aanneemlik is, tekortkominge en al," sê Durby-Anne.
Susan Coetzer het vroue uitgelig as verskillende koeke en terte.
Susan Coetzer het vroue as verskillende koeke en terte geklassifiseer.
‘Ons bring jou die nuutste Tuinroete, Hessequa, Karoo nuus’
