HOFMEYER NUUS - 'n Laat Kersgeskenk het op 28 Desember 2021 by Basie Stuurman, 'n selfversorgende tuinier van Twinsville, opgedaag.
"Basie is 'n bejaarde tuinier, maar hy het reeds ses selfversorgende groentetuine rondom sy huis in Twinsville gevestig. Hy leer ook sy bure en jongmense om hul eie groentetuine aan te lê en te versorg," vertel Tracey Michau van Hofmeyr Hugs of Hope.
Tracey het reeds in Oktober verlede jaar, op haar Facebook-groep, 'n advertensie geplaas om 'n watertenk vir Basie te soek en Neels en Tania Carelsen, van Mayfair Milking Machines in Grahamstad, het dadelik reageer.
Daar is begin met reëlings om die 10 000 liter watertenk, ter waarde van R12 500, vanaf Grahamstad na Hofmeyr te vervoer. Roelf Opperman van Hofmeyr Hugs of Hope het aangebied om die tenk op 28 Desember tydens sy jaarlikse verlof te gaan haal.
"Hoewel brandstofverbruik baie hoër was en windweerstand veroorsaak het dat ek heelwat stadiger gery en dit langer geneem het om Hofmeyr met dié groot geskenk te bereik, was die uitdrukking van verbasing, verwondering en mettertyd absolute ekstase, oor dié watertenk op Basie se gesig 'n groot beloning," sê Opperman.
Die installasie van die tenk is deur Basie en sy bure hanteer, onder die bekwame toesig en leiding van Flip Marais, 'n boer wat ook by Hofmeyr Hugs of Hope betrokke is.
Twinsville-woonbuurt het gewoonlik geen water nie en kinders stap soggens vroeg om kanne water by watertenks wat dikwels tot 2,5 km van hul huise af is te gaan haal. Tot op datum het Basie met sy 90 liter Hippo Roller, ook 'n skenking van Hofmeyr Hugs of Hope af, sy uitgebreide groentetuine versorg.
Basie Stuurman het reeds ses selfversorgende groentetuine rondom sy huis in Twinsville gevestig.
'Ons bring jou die nuutste Hofmeyr, Karoo nuus'
