BOTHAVILLE NUUS - ’n Nuwe hoofstuk in Suid-Afrikaanse landbou-uitnemendheid is geskryf tydens die Lamb Champs 2025-gala by Nampo Alfa in Bothaville, waar Hennie Jonker van Kroonstad as nasionale kampioen aangewys is.

Voor meer as 450 gaste het Jonker se Hampshire Down-lam in elke beoordelingskategorie uitgestaan – van die evaluering van die hoef tot die finale smaaktoets. 

Die Lamb Champs-reeks word deur die Suider-Afrikaanse Agri-inisiatief (Saai) en Provantage angebied, met Pick n Pay as hoofvennoot en Toyota en ZarBet as medeborge.

Die nasionale finaal het vier streekkampioene byeen gebring: Lize Mans (Noord-Kaap), JP Nel (Noordwes), Hennie Jonker (Vrystaat) en Louis Botha (Oos-Kaap). 

Die kompetisie het ’n streng beoordelingsproses deurloop – van slagbeoordeling by Huntersvlei en karkasinspeksie deur die Suid-Afrikaanse Vleisindustrie Maatskappy, tot laboratoriumverifikasie deur die Universiteit van die Vrystaat.

Jonker stap weg met R50 000 kontant, die gesogte bronstrofee van Nic van Rensburg ter waarde van R80 000, en verskeie bykomende pryse.

Saai se uitvoerende hoof, Francois Rossouw, het Pick n Pay bedank vir hul verbintenis tot familieboere: “Pick n Pay het Lamb Champs van ’n kompetisie in ’n beweging verander – hulle verbind verbruikers direk met die mense wat hul kos produseer.”

Volgens Tessa Chamberlain van Pick n Pay weerspieël die vennootskap die maatskappy se toewyding aan plaaslike boerderyerfenis.

Seisoen 2 van die Lamb Champs-televisiereeks verskyn in Junie 2026 op kykNET en DStv.

‘Ons bring jou die nuutste Tuinroete, Hessequa, Karoo nuus’