OOS-LONDON NUUS - Vyf mense het verlede nag, Sondag 8 Maart, hul lewens verloor en 60 is beseer in ’n kop-aan-kopbotsing tussen ’n bus en ’n VW Polo op die N6 tussen KuGompo (Oos-Londen) en Stutterheim.
Volgens ’n mediawoordvoerder van die Oos-Kaapse departement van vervoer, Makhaya Komisa, was die bus met 60 Zimbabwiese burgers op pad na Stutterheim toe die botsing plaasgevind het.
Die Polo, wat vyf insittendes gehad het, was weens die impak onder die bus vasgekeer.
Die beseerde passasiers is na die naaste hospitaal gehaas vir mediese evaluering.
Die oorsaak van die ongeluk sal deur verskeie wetstoepassingsagentskappe verder ondersoek word.
’n Saak van strafbare manslag en roekelose bestuur is by die Stutterheim-polisiestasie aanhangig gemaak.
Die LUR vir Vervoer en Gemeenskapsveiligheid, Xolile Nqatha, het sy innige meegevoel aan die families van die oorledenes betuig en die beseerde passasiers ’n spoedige herstel toegewens.
Nqatha het ook die belangrikheid van die nakoming van verkeersreëls benadruk.
‘Ons bring jou die nuutste Tuinroete, Hessequa, Karoo nuus’
