CRADOCK NUUS - Die jaarlikse Tjaart Vorster Tennistoernooi het onlangs met ’n feestelike seremonie geopen.
Die Tjaart Vorster tennistoernooi word elke jaar deur Marlow Hoër Landbouskool aangebied, ter herinnering aan ’n oudleerder, Tjaart Vorster (‘Dissel’)* wat in vele opsigte ’n rolmodel was.
Cradock Hoërskool se meisies- en seunspanne het uitsonderlike sportmanskap, vasberadenheid en mededingende gees vertoon en ’n uitstekende veldtog by die toernooi gevoer.
Grey Hoërskool van Bloemfontein het onder die seuns geseëvier en die Tjaart Vorster-trofee verwerf, terwyl die CHS-meisies in ’n opwindende finaal teen Oranje Meisieskool meegeding het.
Met hoëgehalte-tennis en intense kompetisie het die Cradockmeisies ’n merkwaardige vertoning gelewer om ’n 18 - 10 oorwinning te behaal.
Hiermee het hulle die gesogte Victoria Manor-wisseltrofee vir die derde agtereenvolgende jaar en die negende keer sedert die toernooi in 2004 begin het, gewen.
Die meisies was dwarsdeur die vyf wedstryde van die toernooi onoorwonne.
CHS-seuns het sterk kompetisie gehad
Op die laaste dag het hulle teen Hoërskool Sentraal meegeding en, ten spyte van ’n vasberade poging, net-net met 4 - 5 verloor.
Hulle het egter ’n indrukwekkende 5 - 4 oorwinning teen die gashere, Marlow Hoër Landbouskool, behaal. Verder het hulle ’n noemenswaardige oorwinning teen Pearson Hoërskool behaal, wat algeheel tweede geëindig het, terwyl Marlow vierde geëindig het.
Cradock Hoërskool spreek opregte dank uit aan al sy lojale ondersteuners wat die tennisspelers deur die toernooi aangemoedig en gemotiveer het.
* Dissel, wat in 2001 met ’n A-gemiddeld aan dié skool matrikuleer het, het op 24 April 2002 tragies in ’n motorongeluk gesterf. Dissel se selfdissipline en innerlike krag was sy persoonlike dryfveer. As puik tennisspeler het hy vir vyf jaar in Marlow Hoër Landbouskool se tennisspanne gespeel, en dié skool by die OP Plattelandse Skole en Sentrale Distrikte verteenwoordig. Eerlikheid, vriendelikheid, lojaliteit en toewyding was kenmerke van dié leerder, en hy het keer op keer sy medespanlede tot groter hoogtes aangemoedig. Sy lewe het gespreek van ’n uitnemende persoonlikheid en lewenslus het hom bo sy geesgenote laat uitstaan.
‘Ons bring jou die nuutste Tuinroete, Hessequa, Karoo nuus’
