OOS-KAAP NUUS - Die aantal motoriste wat in die Oos-Kaap sedert die begin van die feestyd vir dronkbestuur in hegtenis geneem is, is buitengewoon hoog, dit terwyl die feestyd steeds voortduur.
Van 1 tot 23 Desember is altesaam 752 motoriste regoor die provinsie vir dronkbestuur gearresteer. Tussen 24 en 28 Desember is 'n verdere 275 arrestasies gedoen.
Dit bring die totale aantal arrestasies vir die 28 dae periode in Desember op 1 027 te staan, wat neerkom op 'n gemiddeld van 36 per dag.
Oor die afgelope naweek is verskeie hoëprofiel-arrestasies in Lusikisiki in die OR Tambo-distrik gemaak. Onder diegene wat vir dronkbestuur in hegtenis geneem is, was twee polisiebeamptes verbonde aan SAPD Lusikisiki, sowel as twee openbare aanklaers wat onderskeidelik in Butterworth en Mount Frere gebaseer is.
Die distrikte wat die hoogste aantal arrestasies gedurende hierdie tydperk aangeteken het, was OR Tambo met 88 arrestasies, asook die Amathole-distrik wat kort op hul hakke was met 86 arrestasies, terwyl die Alfred Nzo-distrik altesaam 54 arrestasies aangeteken het.
"Hierdie syfers is 'n ernstige bron van kommer vir die Oos-Kaapse Departement van Vervoer, veral aangesien die Nuwejaarstydperk voorlê, met groot feestelikhede wat regoor die provinsie beplan word,” het Unathi Binqose, departementele mediawoordvoerder, gesê in ‘n opdatering oor dronkbestuur-arrestasies in die provinsie gedurende die feestyd.
Hy het gesê verkeersbeamptes sal ten volle ontplooi word en geen verdraagsaamheid teenoor dronkbestuur getoon sal word.
“Elke arrestasie van 'n dronk bestuurder is 'n direkte bydrae tot die redding van lewens op ons paaie. Dit is duidelik in die skerp afname in padsterftes wat oor die Kersnaweek aangeteken is in vergelyking met 2024. Hoewel hierdie vordering bemoedigend is, is selfs een padsterfte een te veel.”
Hy het ‘n beroep gedoen op alle padgebruikers om verantwoordelik op te tree, verkeerswette te gehoorsaam en te verseker dat hulle nie drink en bestuur nie.
‘We bring you the latest Garden Route, Hessequa, Karoo news’
